ಲೋಕದರ್ಶನ ವರದಿ 

          ಬೈಲಹೊಂಗಲ 31 : ಐಸಿಎಆರ್‌-ಕೆಎಲ್‌ಇ ಕೃಷಿ ವಿಜ್ಞಾನ ಕೇಂದ್ರ, ಮತ್ತಿಕೊಪ್ಪ ಹಾಗೂ ಇನಾಂದಾರ್ ಶುಗರ್ಸ್‌ ಜಂಟಿ ಆಶ್ರಯದಲ್ಲಿ ಚಚಡಿ ಮತ್ತು ಹಿರೇಬೂದನೂರು ಗ್ರಾಮಗಳಲ್ಲಿ ಸಮಗ್ರ ಕಬ್ಬು ನಿರ್ವಹಣಾ ತರಬೇತಿ ಕಾರ್ಯಕ್ರಮ ನೆರವೇರಿತು. ಕಾರ್ಯಕ್ರಮದಲ್ಲಿ ಕೇಂದ್ರದ ಮುಖ್ಯಸ್ಥರಾದ ಡಾ. ಮಂಜುನಾಥ ಚೌರಡ್ಡಿ ಅವರು ಕಬ್ಬಿನ ವೈಜ್ಞಾನಿಕ ಬೇಸಾಯ ಹಾಗೂ ಸಮಗ್ರ ಪೋಷಕಾಂಶ ನಿರ್ವಹಣೆ ಕುರಿತು ರೈತರಿಗೆ ಸವಿಸ್ತಾರವಾದ ಮಾಹಿತಿ ನೀಡಿದರು. ಯುವಕರು ಕೃಷಿಯಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳಬೇಕೆಂದು ಕರೆ ನೀಡಿದ ಅವರು, ಪ್ರತಿ ಗ್ರಾಮದ 25 ಯುವ ರೈತರನ್ನು ಆಯ್ಕೆ ಮಾಡಿ ಎಕರೆಗೆ 100 ಟನ್ ಇಳುವರಿ ಪಡೆಯುವ ವಿಶೇಷ ಗುರಿ ಹೊಂದಲಾಗಿದೆ ಎಂದರು.

           ರೈತರ ಅನುಕೂಲಕ್ಕಾಗಿ ಕೆವಿಕೆ ಮತ್ತು ಇನಾಂದಾರ್ ಶುಗರ್ಸ್‌ ಜಂಟಿಯಾಗಿ   ತಳಿಯ ಪೌಂಢೇಶನ್ ಸಸಿಗಳನ್ನು ಸಿದ್ಧಪಡಿಸಿ ನೇರವಾಗಿ ರೈತರ ಮನೆ ಬಾಗಿಲಿಗೆ ತಲುಪಿಸುವ ವ್ಯವಸ್ಥೆ ಮಾಡಲಾಗುತ್ತಿದೆ. ರಾಸಾಯನಿಕ ಗೊಬ್ಬರಗಳ ವೆಚ್ಚವನ್ನು ಶೇಕಡಾ 30 ರಷ್ಟು ಕಡಿತಗೊಳಿಸಲು ಕೆವಿಕೆಯಿಂದ ಉತ್ತಮ ಗುಣಮಟ್ಟದ ಜೈವಿಕ ಗೊಬ್ಬರ ಹಾಗೂ ಜೈವಿಕ ಕೀಟನಾಶಕಗಳನ್ನು ಉತ್ಪಾದಿಸಿ ನೀಡಲಾಗುತ್ತಿದೆ. ಆಯ್ಕೆಯಾದ ಯುವ ರೈತರ ಹೊಲಗಳಿಗೆ ಪ್ರತಿ 15 ದಿನಕ್ಕೊಮ್ಮೆ ಕೆವಿಕೆ ವಿಜ್ಞಾನಿಗಳು ಭೇಟಿ ನೀಡಿ, ಸೂಕ್ತ ಮಾರ್ಗದರ್ಶನ ನೀಡುವ ಮೂಲಕ 100 ಟನ್ ಇಳುವರಿ ಗುರಿ ತಲುಪಲು ನೆರವಾಗಲಿದ್ದಾರೆ.  

ತೆನಿಕೊಳ್ಳದ ಕೆಎಲ್‌ಇ ಕೃಷಿ ಮಹಾವಿದ್ಯಾಲಯದ ಸಹಾಯಕ ಪ್ರಾಧ್ಯಾಪಕ ಡಾ. ಸೌರಭ ಮುನವಳ್ಳಿ ಕಬ್ಬು ಬೆಳೆಯಲ್ಲಿ ಕೃತಕ ಬುದ್ಧಿಮತ್ತೆ   ತಂತ್ರಜ್ಞಾನದ ಬಳಕೆಯ ಬಗ್ಗೆ ಬೆಳಕು ಚೆಲ್ಲಿದರು. ಕಾಲೇಜು ಆವರಣದಲ್ಲಿ ಈಗಾಗಲೇ ಅನುಷ್ಠಾನಗೊಳಿಸಲಾಗಿರುವ ಎಐ-ಆಧಾರಿತ ಕಬ್ಬಿನ ಪ್ರಾತ್ಯಕ್ಷಿಕಾ ತೋಟಕ್ಕೆ ಭೇಟಿ ನೀಡುವಂತೆ ಅವರು ಸ್ಥಳೀಯ ರೈತರಿಗೆ ಆಹ್ವಾನ ನೀಡಿದರು. 

          ಇನಾಂದಾರ್ ಶುಗರ್ಸ್‌ನ ಕಬ್ಬು ವಿಭಾಗದ ವ್ಯವಸ್ಥಾಪಕ ಬಾಳಪ್ಪ ಶೇಗುಣಶಿ ಮಾತನಾಡಿ, ಕಾರ್ಖಾನೆಯಿಂದ ಆರಂಭಿಸಲಾಗಿರುವ 'ಕಿಸಾನ್ ಬಜಾರ್' ಸೌಲಭ್ಯವನ್ನು ರೈತರು ಸದುಪಯೋಗಪಡಿಸಿಕೊಳ್ಳಬೇಕೆಂದು ವಿನಂತಿಸಿದರು.  ಈ ಸಂದರ್ಭದಲ್ಲಿ ಪ್ರಗತಿಪರ ರೈತ ನಾಗರಾಜ ದೇಸಾಯಿ ಸೇರಿದಂತೆ ಸ್ಥಳೀಯ ನಾಯಕರು ಹಾಗೂ ಅಪಾರ ಸಂಖ್ಯೆಯ ಕಬ್ಬು ಬೆಳೆಗಾರರು ಉಪಸ್ಥಿತರಿದ್ದರು.  ಚಚಡಿ ಗ್ರಾಮದಲ್ಲಿ ಹಮ್ಮಿಕೊಂಡ ಕಾರ್ಯಕ್ರಮದಲ್ಲಿ ಮಂಜುನಾಥ ಚೌರಡ್ಡಿ, ಸೌರಭ ಮುನವಳ್ಳಿ, ಬಾಳಪ್ಪ ಶೇಗುಣಶಿ ಮತ್ತು ನಾಗರಾಜ ದೇಸಾಯಿ ಉಪಸ್ಥಿತರಿದ್ದರು.