ಎ.ಎ. ಪಾಟೀಲ ಮಹಿಳಾ ಮಹಾವಿದ್ಯಾಲಯ ಡಬಲ್ ಚಾಂಪಿಯನ್ಸ್‌ 

ಚಿಕ್ಕೋಡಿ 16: ಇಲ್ಲಿನ ಸಿ.ಟಿ.ಇ. ಸಂಸ್ಥೆಯ ಶತಮಾನೋತ್ಸವದ ಅಂಗವಾಗಿ ಆಯೋಜಿಸಲಾದ ಸೆಂಟೆನರಿ ಪ್ರೊ ಕಬಡ್ಡಿ ಚಾಂಪಿಯನ್‌ಶಿಪ್ ಹಾಗೂ ಅಕ್ಕಮಹಾದೇವಿ ಮಹಿಳಾ ವಿಶ್ವವಿದ್ಯಾಲಯದ ಅಂತರ ಕಾಲೇಜು ಕಬಡ್ಡಿ ಪಂದ್ಯಾವಳಿಗಳಲ್ಲಿ ಚಿಕ್ಕೋಡಿಯ ಸಿ.ಟಿ.ಇ. ಸಂಸ್ಥೆಯ ಎ.ಎ. ಪಾಟೀಲ ಮಹಿಳಾ ಮಹಾವಿದ್ಯಾಲಯದ ಕಬಡ್ಡಿ ತಂಡವು ಡಬಲ್ ಚಾಂಪಿಯನ್ಸ್‌ ಪಟ್ಟ ಗಳಿಸಿದೆ. ತಂಡದ ಆಟಗಾರ್ತಿಯರು ಶ್ರದ್ಧೆ, ಶಿಸ್ತು ಮತ್ತು ಸಮನ್ವಯದಿಂದ ಪ್ರತಿಯೊಂದು ಹಂತದಲ್ಲೂ ಅಜೇಯ ಪ್ರದರ್ಶನ ನೀಡುತ್ತಾ, ಕೊನೆಯಲ್ಲಿ ಎರಡೂ ಕೀರೀಟಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ. 

ಅಂತರ ಕಾಲೇಜು ಕಬಡ್ಡಿಯಲ್ಲಿ ಹುಬ್ಬಳ್ಳಿ ತಂಡದ ಮೇಲೆ ಭರ್ಜರಿ ಗೆಲುವು: ಅಕ್ಕಮಹಾದೇವಿ ಮಹಿಳಾ ವಿಶ್ವವಿದ್ಯಾಲಯದ ಅಂತರ ಕಾಲೇಜು ಕಬಡ್ಡಿ ಪಂದ್ಯಾವಳಿಯಲ್ಲಿ ಎ.ಎ. ಪಾಟೀಲ ಮಹಿಳಾ ಮಹಾವಿದ್ಯಾಲಯದ ಕಬಡ್ಡಿ ತಂಡವು ಹುಬ್ಬಳ್ಳಿಯ ಎಂ.ವಿ.ಎಸ್‌. ಮಹಿಳಾ ಕಾಲೇಜನ್ನು 28ಹಿ6 ಅಂತರದಿಂದ ಸೋಲಿಸಿ ಚಾಂಪಿಯನ್ ಆಗಿದೆ. ದ್ವಿತೀಯ ಸ್ಥಾನವನ್ನು ಎಂ.ವಿ.ಎಸ್‌. ಮಹಿಳಾ ಕಾಲೇಜು ಹುಬ್ಬಳ್ಳಿ ಪಡೆದುಕೊಂಡಿದ್ದು, ತೃತೀಯ ಸ್ಥಾನ ಬೈಲಹೊಂಗಲದ ಸರ್ಕಾರಿ ಪ್ರಥಮ ದರ್ಜೆ ಮಹಿಳಾ ಕಾಲೇಜು ಹಾಗೂ ಚತುರ್ಥ ಸ್ಥಾನ ಮುಧೋಳಿನ ದಾನಮ್ಮದೇವಿ ಮಹಿಳಾ ಕಾಲೇಜು ಪಡೆದಿವೆ. 

 ಸೆಂಟೆನರಿ ಪ್ರೊ ಕಬಡ್ಡಿ ರಾಷ್ಟ್ರಮಟ್ಟದ ಸ್ಪರ್ಧೆಯಲ್ಲಿ ಚಿಕ್ಕೋಡಿಯ ಅಬ್ಬರ: ಸಿ.ಟಿ.ಇ. ಸಂಸ್ಥೆಯು ತನ್ನ **106ನೇ ವರ್ಷ ಪೂರ್ತಿಯ ಅಂಗವಾಗಿ ಆಯೋಜಿಸಿದ ಸೆಂಟೆನರಿ ಪ್ರೊ ಕಬಡ್ಡಿ ಚಾಂಪಿಯನ್‌ಶಿಪ್ (ರಾಷ್ಟ್ರಮಟ್ಟದ ಮುಕ್ತ ಮಹಿಳಾ ಕಬಡ್ಡಿ ಪಂದ್ಯಾವಳಿ)**ಯಲ್ಲಿಯೂ ಕೂಡ ಎ.ಎ. ಪಾಟೀಲ ಮಹಿಳಾ ಮಹಾವಿದ್ಯಾಲಯದ ಕಬಡ್ಡಿ ತಂಡವು ಅಜೇಯ ಸಾಧನೆ ತೋರಿತು. ಅಂತಿಮ ಹಂತದಲ್ಲಿ ಮೈಸೂರಿನ ಹ್ಯಾಪಿ ಗರ್ಲ್ಸ್‌ ತಂಡವನ್ನು 21ಹಿ12 ಅಂತರದಿಂದ ಸೋಲಿಸಿ, ಚಿಕ್ಕೋಡಿಯ ಯುವತಿಯರು ಮತ್ತೊಮ್ಮೆ ಚಾಂಪಿಯನ್ ಪಟ್ಟ ಕಬಳಿಸಿದರು. ವಿಜೇತರಿಗೆ ರೂ. 31,000 ನಗದು ಬಹುಮಾನ, ದ್ವಿತೀಯ ಸ್ಥಾನ ಹ್ಯಾಪಿ ಗರ್ಲ್ಸ್‌ ಮೈಸೂರಿಗೆ ರೂ. 21,000, ತೃತೀಯ ಸ್ಥಾನ ವಿಜಯ ವಾರಿಯರ್ಸ್‌ ಅಥಣಿಗೆ ರೂ. 11,000, ಹಾಗೂ ನಾಲ್ಕನೇ ಸ್ಥಾನ ಎಸ್‌.ಎಸ್‌.ಎ. ಹರಿಯಾಣಾ ತಂಡಕ್ಕೆ ರೂ. 11,000 ನಗದು ಬಹುಮಾನ ವಿತರಿಸಲಾಯಿತು. 

ದೇಶದ ವಿವಿಧ ರಾಜ್ಯಗಳಿಂದ ಭಾಗವಹಿಸಿದ 34 ತಂಡಗಳು: ಅಕ್ಕಮಹಾದೇವಿ ಮಹಿಳಾ ವಿಶ್ವವಿದ್ಯಾಲಯದ ಅಂತರ ಕಾಲೇಜು ಕಬಡ್ಡಿಯಲ್ಲಿ 18 ಮಹಿಳಾ ತಂಡಗಳು ಹಾಗೂ ಸೆಂಟೆನರಿ ಪ್ರೊ ಕಬಡ್ಡಿಯಲ್ಲಿ ಕರ್ನಾಟಕ, ಮಹಾರಾಷ್ಟ್ರ, ಹರಿಯಾಣ ಸೇರಿದಂತೆ 16 ತಂಡಗಳು ಭಾಗವಹಿಸಿದ್ದವು. ಈ ಮೂಲಕ ಚಿಕ್ಕೋಡಿ ಕ್ರೀಡಾ ಕ್ಷೇತ್ರದಲ್ಲಿ ರಾಷ್ಟ್ರೀಯ ಮಟ್ಟದ ಕೇಂದ್ರೀಯ ವೇದಿಕೆಯಾಗಿದೆ. ಎ.ಎ. ಪಾಟೀಲ ಮಹಿಳಾ ಮಹಾವಿದ್ಯಾಲಯದ ಕಬಡ್ಡಿ ತಂಡದ ಪ್ರತಿಭಾವಂತ ಆಟಗಾರ್ತಿ ಅಮೂಲ್ಯಾ ಪಾಟೀಲ ಅವರಿಗೆ ಅತ್ಯುತ್ತಮ ಆಟಗಾರ್ತಿ ಪ್ರಶಸ್ತಿ ದೊರೆತಿದ್ದು, ಪಂಕ್ ಫೌಂಡೇಶನ್ ವತಿಯಿಂದ ರೂ. 11,000 ಹಾಗೂ ಸಿ.ಟಿ.ಇ. ಸಂಸ್ಥೆಯ ಉಪಾಧ್ಯಕ್ಷ ವಿ.ಎಸ್‌. ಮಾಂಜರೇಕರರಿಂದ ರೂ. 10,000 ನಗದು ಬಹುಮಾನ ನೀಡಿ ಗೌರವಿಸಲಾಯಿತು. 

ಡಿ.ವೈ.ಎಸ್‌.ಪಿ. ಗೋಪಾಲಕೃಷ್ಣ ಗೌಡರ, ಶಿಕ್ಷಣ ಇಲಾಖೆಯ ಉಪನಿರ್ದೇಶಕ ಸೀತಾರಾಮ, ಸಿ.ಟಿ.ಇ. ಸಂಸ್ಥೆಯ ಉಪಾಧ್ಯಕ್ಷ ವಿ.ಎಸ್‌. ಮಾಂಜರೇಕರ, ನಿರ್ದೇಶಕ ವಿ.ಪಿ. ಶೇಡಬಾಳ, ಸಂಜಯ ಅಡಕೆ, ಓಂಕಾರ ಕುಲಕರ್ಣಿ, ಸಂಕೇತ ಮಾಂಜರೇಕರ, ಪಂಕ್ ಫೌಂಡೇಶನ್ ಅಧ್ಯಕ್ಷೆ ಗೌರಿ ಮಾಂಜರೇಕರ್, ಮಿಥುನ ದೇಶಪಾಂಡೆ, ಪ್ರಾಚಾರ್ಯರು ಎಸ್‌.ಸಿ. ಜಕಾತಿ, ಯು.ಎಸ್‌. ಶಿಂದೆ, ಎಫ್‌.ಎಸ್‌. ಕುಲಕರ್ಣಿ, ಅನಿತಾ ಜೋಶಿ, ಜಿ.ಪಿ. ಇನಾಮದಾರ, ಡಾ. ಸಿ.ವಿ. ಹೀರೆಮಠ, ಜೋಶಿ ಸೇರಿದಂತೆ ಸಿ.ಟಿ.ಇ. ಸಂಸ್ಥೆಯ ಎಲ್ಲಾ ಶಿಕ್ಷಕ-ಶಿಕ್ಷಕಿಯರು ಹಾಗೂ ಸಿಬ್ಬಂದಿಗಳು ಉಪಸ್ಥಿತರಿದ್ದರು.