ನಮ್ಮೂರ ಬಾನುಲಿ 90.8 ಎಫ್ ಎಮ್‌ನಲ್ಲಿ ಶಿಕ್ಷಕರ ದಿನಾಚರಣೆಯ ವಿಶೇಷ ಕಾರ್ಯಕ್ರಮ  

ಯಮಕನಮರಡಿ 04: ತಾಲೂಕಿನ ಕರಗುಪಿ- ಯಲ್ಲಾಪುರ ನಮ್ಮೂರ ಬಾನುಲಿ ಸಮುದಾಯ ರೇಡಿಯೋ ಕೇಂದ್ರ 90.8 ಎಫ್ ಎಮ್‌ನಲ್ಲಿ ಶಿಕ್ಷಕರ ದಿನಾಚರಣೆಯ ಅಂಗವಾಗಿ, ಅರ್ಥಪೂರ್ಣ ಹಾಗೂ ಪ್ರೇರಣಾದಾಯಕ ಸಂದರ್ಶನ ಕಾರ್ಯಕ್ರಮ ಆಯೋಜಿಸಲಾಯಿತು.  

ಈ ವಿಶೇಷ ಕಾರ್ಯಕ್ರಮದಲ್ಲಿ ಬೆಳಗಾವಿಯ ಮಾಹೇಶ್ವರಿ ಅಂಧ ಮಕ್ಕಳ ಶಾಲೆಯ ಇಬ್ಬರು ಶಿಕ್ಷಕರು ತಮ್ಮ ಅನುಭವಗಳನ್ನು ಹಂಚಿಕೊಂಡರು. ಸುಮಿತಾ ಪಿ. ಮಿಟಗಾರ್, ಸಂಗೀತ ಶಿಕ್ಷಕಿ ಹಾಗೂ ಜಿನ್ನಪ್ಪ ಟಕಾಯಿ, ಕ್ರಾಫ್ಟ್‌ ಮತ್ತು ಬ್ರೈಲ್ ಶಿಕ್ಷಕರು, ಅಂಧ ಮಕ್ಕಳ ಶಿಕ್ಷಣದಲ್ಲಿ ಎದುರಾಗುವ ಸವಾಲುಗಳು ಮತ್ತು ತಮ್ಮ ಬೋಧನಾ ಅನುಭವಗಳು ಎಂಬ ವಿಷಯದ ಬಗ್ಗೆ ಮನಮುಟ್ಟುವ ಮಾತುಗಳನ್ನು ಪ್ರಸ್ತಾಪಿಸಿದರು.  

ಸಂದರ್ಶನದ ವೇಳೆ ಅವರು ವಿಶೇಷ ಮಕ್ಕಳಿಗೆ ಶಿಕ್ಷಣ ನೀಡುವಾಗ ಎದುರಿಸಬೇಕಾಗುವ ತಾಂತ್ರಿಕ, ಮಾನಸಿಕ ಮತ್ತು ಸಾಮಾಜಿಕ ಅಡಚಣೆಗಳ ಬಗ್ಗೆ ವಿವರಿಸಿದರು. ಜೊತೆಗೆ, ಸಂಗೀತ ಮತ್ತು ಕ್ರಾಫ್ಟ್‌ ಕಲಿಕೆಯ ಮಹತ್ವವನ್ನು ಹಂಚಿಕೊಂಡು, ಇಂತಹ ಚಟುವಟಿಕೆಗಳು ಮಕ್ಕಳ ಆತ್ಮವಿಶ್ವಾಸವನ್ನು ಹೇಗೆ ಹೆಚ್ಚಿಸುತ್ತವೆ ಎಂಬುದರ ಕುರಿತು ಮನನೀಯ ವಿಚಾರಗಳನ್ನು ತಿಳಿಸಿದರು.  

ಈ ಕಾರ್ಯಕ್ರಮವನ್ನು ನಮ್ಮೂರ ಬಾನುಲಿ ರೇಡಿಯೋ ಕೇಂದ್ರದ ರೇಡಿಯೋ ನಿರೂಪಕಿ ಆರ್‌.ಜೆ. ಮೀರಾ ನಡೆಸಿದರು. ಅವರು ಅತಿಥಿಗಳೊಂದಿಗೆ ಸಂವಾದ ನಡೆಸಿ, ಶ್ರೋತೃಗಳಿಗೆ ಸ್ಪೂರ್ತಿದಾಯಕ ಮಾಹಿತಿಯನ್ನು ತಲುಪಿಸಿದರು.  

ಶಿಕ್ಷಕರ ದಿನಾಚರಣೆ ಹಿನ್ನೆಲೆ ಈ ಕಾರ್ಯಕ್ರಮವು ಶ್ರೋತೃಗಳಿಂದ ಅಪಾರ ಮೆಚ್ಚುಗೆ ಪಡೆದು, ಅಂಧ ಮಕ್ಕಳ ಶಿಕ್ಷಣದ ಪ್ರಾಮುಖ್ಯತೆಯನ್ನು ಅರಿವಿಗೆ ತಂದಿದೆ.