ಬಳ್ಳಾರಿ 3: ರಾಷ್ಟ್ರೀಯ ಪಲ್ಸ್‌ ಪೋಲಿಯೊ ಅಭಿಯಾನದಲ್ಲಿ ಬಳ್ಳಾರಿ ಜಿಲ್ಲೆ ಗುರಿಗಿಂತ ಹೆಚ್ಚು ಮಕ್ಕಳಿಗೆ ಲಸಿಕೆ ನೀಡುವ ಮೂಲಕ ಶೇ.101.2ರಷ್ಟು ಸಾಧನೆ ಮಾಡಿದೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ. ಎಲ್‌. ರಮೇಶ್ ಬಾಬು ತಿಳಿಸಿದ್ದಾರೆ.  ಜೂನ್ 28ರಿಂದ ಜುಲೈ 1ರವರೆಗೆ ನಡೆದ ನಾಲ್ಕು ದಿನಗಳ ಅಭಿಯಾನದಲ್ಲಿ ಜಿಲ್ಲೆಯ 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ 1,99,934 ಮಕ್ಕಳಿಗೆ ಪೋಲಿಯೊ ಲಸಿಕೆ ನೀಡುವ ಗುರಿ ಹೊಂದಲಾಗಿತ್ತು. ಆದರೆ ಆರೋಗ್ಯ ಇಲಾಖೆಯ ವಿಶೇಷ ಕಾರ್ಯತಂತ್ರದಿಂದ 2,02,387 ಮಕ್ಕಳಿಗೆ ಎರಡು ಹನಿ ಪೋಲಿಯೊ ಲಸಿಕೆ ನೀಡಿ ಗುರಿಯನ್ನು ಮೀರಿಸಲಾಗಿದೆ.  ಎಲ್ಲ ತಾಲೂಕುಗಳಲ್ಲೂ ಶೇ.100ಕ್ಕೂ ಹೆಚ್ಚು ಸಾಧನೆ  ಅಭಿಯಾನದಲ್ಲಿ ಜಿಲ್ಲೆಯ ಎಲ್ಲ ತಾಲೂಕುಗಳು ಶೇ.100ಕ್ಕೂ ಹೆಚ್ಚು ಪ್ರಗತಿ ದಾಖಲಿಸಿವೆ.  

ಬಳ್ಳಾರಿ: 96,741 ಮಕ್ಕಳು (ಶೇ.100.9)   

ಕಂಪ್ಲಿ: 15,368 ಮಕ್ಕಳು (ಶೇ.105.1)   

ಕುರುಗೋಡು: 17,483 ಮಕ್ಕಳು (ಶೇ.101.4)   

ಸಂಡೂರು: 36,363 ಮಕ್ಕಳು (ಶೇ.101.5)   

ಸಿರುಗುಪ್ಪ: 36,432 ಮಕ್ಕಳು (ಶೇ.100.2)   

ಕ್ಲಿಷ್ಟ ಪ್ರದೇಶಗಳಿಗೂ ಲಸಿಕೆ ತಲುಪಿಸಿದ ಆರೋಗ್ಯ ಇಲಾಖೆ  ಜಿಲ್ಲೆಯ 335 ಕ್ಲಿಷ್ಟ ಪ್ರದೇಶಗಳನ್ನು ಗುರುತಿಸಿ 236 ವಿಶೇಷ ತಂಡಗಳನ್ನು ನಿಯೋಜಿಸಲಾಗಿತ್ತು. ಅಭಿಯಾನದ ವೇಳೆ 977 ಪೋಲಿಯೊ ಬೂತ್ಗಳು ಹಾಗೂ 615 ಮನೆ-ಮನೆ ಭೇಟಿ ತಂಡಗಳು ಕಾರ್ಯನಿರ್ವಹಿಸಿದ್ದು, ಪ್ರತಿಯೊಂದು ಮಗುವಿಗೂ ಲಸಿಕೆ ತಲುಪಿಸಲು ವಿಶೇಷ ಕ್ರಮ ಕೈಗೊಳ್ಳಲಾಯಿತು ಎಂದು ಜಿಲ್ಲಾ ಆರ್ಸಿಎಚ್ ಅಧಿಕಾರಿ ಡಾ. ಹನುಮಂತಪ್ಪ ಮಾಹಿತಿ ನೀಡಿದರು.  

ಬಸ್ ನಿಲ್ದಾಣ, ಮಾರುಕಟ್ಟೆ, ಸಂತೆ ಸೇರಿದಂತೆ ಜನಸಂದಣಿ ಪ್ರದೇಶಗಳಲ್ಲಿ 50 ವಿಶೇಷ ತಂಡಗಳನ್ನು ನಿಯೋಜಿಸಲಾಗಿತ್ತು. ವಲಸೆ ಕಾರ್ಮಿಕರ ವಸತಿ ಪ್ರದೇಶಗಳು, ಇಟ್ಟಿಗೆ ಭಟ್ಟಿಗಳು, ಕಟ್ಟಡ ಕಾಮಗಾರಿ ಸ್ಥಳಗಳು ಹಾಗೂ ಇತರ ದುರ್ಗಮ ಪ್ರದೇಶಗಳಿಗೆ 15 ಮೊಬೈಲ್ ತಂಡಗಳ ಮೂಲಕ ಲಸಿಕೆ ತಲುಪಿಸಲಾಯಿತು.  

ಸಿಬ್ಬಂದಿ ಸೇವೆಗೆ ಅಭಿನಂದನೆ  ಅಭಿಯಾನದ ಯಶಸ್ಸಿಗೆ ಆರೋಗ್ಯ ಇಲಾಖೆ ಸಿಬ್ಬಂದಿ, ನರ್ಸಿಂಗ್ ಕಾಲೇಜು ವಿದ್ಯಾರ್ಥಿಗಳು, ಸ್ವಯಂಸೇವಕರು ಹಾಗೂ ವಿವಿಧ ಇಲಾಖೆಗಳ ಅಧಿಕಾರಿಗಳು ಶ್ರಮಿಸಿದ್ದಾರೆ. ಅವರ ಸೇವೆಯನ್ನು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ. ಎಲ್‌. ರಮೇಶ್ ಬಾಬು ಅಭಿನಂದಿಸಿದ್ದಾರೆ.