ಲೋಕದರ್ಶನ ವರದಿ  

ಯಲಬುರ್ಗಾ 04: ತಾಲೂಕಿನ ಕುಡಗುಂಟಿ ಗ್ರಾಮದ ರೈತ ಬಸವರಾಜ ಬೊಮ್ಮನಾಳ ಅವರ ತೋಟದಲ್ಲಿ ಬೆಳಿಗ್ಗೆ ಗಾಯಗೊಂಡ ವನ್ಯ ಜೀವಿ ನರಿ ಪತ್ತೆಯಾಗಿದ್ದು, ತಕ್ಷಣ ಯಲಬುರ್ಗಾ ಅರಣ್ಯ ಇಲಾಖೆಯ ವಲಯ ಅರಣ್ಯ ಅಧಿಕಾರಿಗಳಿಗೆ ಕರೆ ಮಾಡಿ, ಪ್ರಥಮ ಚಿಕಿತ್ಸೆ ಕೊಡಿಸಿ ಸುರಕ್ಷಿತವಾಗಿ ಕುಕನೂರ ತಾಲೂಕಿನ ಚಂಡೂರು ಗ್ರಾಮದ ಮೀಸಲು ಅರಣ್ಯ ಪ್ರದೇಶಕ್ಕೆ ಕೊಂಡೊಯ್ಯಲಾಯಿತು. ನಂತರ ಮಾತನಾಡಿದ ಉಪ ವಲಯ ಅರಣ್ಯಾಧಿಕಾರಿ ಲಿಂಗರಾಜ ಕನ್ನಾಳ ಇತ್ತೀಚಿನ ದಿನಗಳಲ್ಲಿ ಮನುಷ್ಯನ ಕ್ರೌರ್ಯದಿಂದಾಗಿ ವನ್ಯ ಜೀವಿಗಳು ವಿನಾಶದತ್ತ ಸಾಗುತ್ತಿದ್ದು, ಅವುಗಳ ರಕ್ಷಣೆ ಆಗಬೇಕಿದೆ ಎಂದು ಹೇಳಿದರು. ವನ್ಯಜೀವಿಗಳ ರಕ್ಷಣೆಗೆ ಭಾರತ ದೇಶದಲ್ಲಿ ಉತ್ತಮ ವಾತವರಣ ಹೊಂದಿದ್ದು, ಪ್ರಾಣಿ ಸಂಕುಲಗಳ ಅಭಿವೃದ್ಧಿಗೆ ಸಹಕಾರಿಯಾಗಿದೆ. ವಿಶ್ವದಲ್ಲಿ ದಕ್ಷಿಣ ಆಫ್ರಿಕಾ ಹೊರತುಪಡಿಸಿದರೆ ಅತಿ ಹೆಚ್ಚು ಪ್ರಾಣಿಗಳ ಸಂಖ್ಯೆ ಭಾರತದಲ್ಲಿ ಇದೆ. ಪರಿಸರ ಸಮತೋಲನ ಕಾಪಾಡುವಲ್ಲಿ ಅತ್ಯಂತ ಮಹತ್ತರ ಪಾತ್ರ ವಹಿಸುತ್ತವೆ ಎಂದರು. ಅರಣ್ಯ ಇಲಾಖೆಯ ಸಿಬ್ಬಂದಿಗಳಾದ ಜಗದೀಶ ಮರಡಿ, ಶರಣಪ್ಪ ರಾಜೂರ, ಯಮನೂರ​‍್ಪ ಬೊಮ್ಮನಾಳ, ಬಸವರಾಜ ಬೊಮ್ಮನಾಳ ಇದ್ದರು.