ರಾಣೇಬೆನ್ನೂರು 20: ಸಾಧನೆ ಯಾರೊಬ್ಬರ ಸ್ವತ್ತಲ್ಲ ಅದು ಸಾಧಕನ ಸ್ವತ್ತು ಮಾತ್ರ. ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಪಾಲ್ಗೊಳ್ಳುವುದು ಇಂದಿನ ವಿದ್ಯಾರ್ಥಿಗಳಲ್ಲಿ ಹಬ್ಬದ ರೂಪದಲ್ಲಿ ಭಾವನೆಗಳು ಮೂಡಬೇಕು ಅದು ನಿಜವಾದ ಪರೀಕ್ಷೆ ಆಗುತ್ತದೆ ಎಂದು ಆಂಗ್ಲಭಾಷಾ ಶಿಕ್ಷಕ ಜಗದೀಶ್ ಮಳೆಮಠ ವಿದ್ಯಾರ್ಥಿ ಸಮುದಾಯಕ್ಕೆ ಕರೆ ನೀಡಿದರು. ಅವರು ಇಲ್ಲಿನ ಮುಂಬೈ ಕರ್ನಾಟಕ ವಿಜ್ಞಾನ ವಾಣಿಜ್ಯ ಕಾಲೇಜಿನಲ್ಲಿ ಆಯೋಜಿಸಿದ್ದ, ಆರ್ಯಭಟ ಪ್ರತಿಭಾ ಪರೀಕ್ಷೆ - 2026 ಉದ್ಘಾಟಿಸಿ ಮಾತನಾಡಿದರು.   

           ಇಂದಿನ ದಿನಮಾನಗಳಲ್ಲಿ ಜ್ಞಾನ ವಿಜ್ಞಾನ ಮತ್ತು ತಂತ್ರಜ್ಞಾನ ಹಾಗೂ ಹೊಸ ಹೊಸ ಆವಿಷ್ಕಾರಗಳು ಹೇರಳವಾಗಿ ದೊರೆಯುವುದರಿಂದ ಪರೀಕ್ಷೆಯಲ್ಲಿ ಅಪ್ರತಿಮ ಸಾಧನೆ ಮಾಡಲು ಸಾಧ್ಯವಾಗುತ್ತಲಿದೆ. ನಿತ್ಯ, ನಿರಂತರ ಜ್ಞಾನ ಸಂಪತ್ತು ಹೊಂದಬೇಕಾದರೆ ಇಂದಿನ ವಿದ್ಯಾರ್ಥಿಗಳು ಪರಸ್ಪರ ಚರ್ಚೆ ವಿಚರ್ಚೆ ಮತ್ತು ಸಮಾಲೋಚನೆ ಹಾಗೂ ವಿನಿಮಯ ಇವುಗಳು ಅಳವಡಿಸಿಕೊಂಡಾಗ ಮಾತ್ರ ಅದ್ಭುತ ಸಾಧನೆ ಮಾಡಲು ಸಾಧ್ಯವಾಗುತ್ತದೆ ಎಂದರು. ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದ, ಎಂಕೆಇ ಶಿಕ್ಷಣ ಟ್ರಸ್ಟ್‌  ಅಧ್ಯಕ್ಷ ಡಾ. ಆರ್‌. ಎಸ್‌. ಎಲಿ ಅವರು ಮಾತನಾಡಿ, ಶಿಕ್ಷಣ ಸೇವೆ ಭಗವಂತನ ಸೇವೆ.

          ಸೇವೆಯೇ ಪ್ರಧಾನವಾಗಿರಿಸಿಕೊಂಡು ಈ ಶಿಕ್ಷಣ ಸಂಸ್ಥೆಯನ್ನು, ಹಿರಿಯರ ಮಾರ್ಗದರ್ಶನದಲ್ಲಿ ಆರಂಭಿಸಲಾಗಿದ್ದು, ಶಿಕ್ಷಣ   ಕ್ಷೇತ್ರದಲ್ಲಿ ತನ್ನದೇ ಆದ ಗುರಿಯೊಂದಿಗೆ, ಸಾಧನೆಯ ಹಾದಿಯಲ್ಲಿ ಸಾಗಿದ್ದೇವೆ ಎಂದು ತಮ್ಮ ಹರ್ಷ ವ್ಯಕ್ತಪಡಿಸಿದರು. ಆರ್ಯಭಟ ಪ್ರತಿಭಾ ಪರೀಕ್ಷೆ ನಡೆದು ಫಲಿತಾಂಶವನ್ನು ಘೋಷಿಸಿದ, ಶಿಕ್ಷಣ ಸಂಸ್ಥೆಯ ಪ್ರಾಂಶುಪಾಲ ಜಿಲಾನಿ ಹೊಸಕಟ್ಟಿ ಅವರು ವಿದ್ಯಾರ್ಥಿಗಳ ಶುಭ ಹಾರೈಸಿದರು. ಕವಿತಾ ಸಂಗಡಿಗರು ಪ್ರಾರ್ಥಿಸಿದರು. ಡಾ. ಸಂತೋಷ್ ಸ್ವಾಗತಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಶ್ರೀಮತಿ ಸುಮಾ ಉದಯ ನಿರೂಪಿಸಿ, ಡಾ. ಜಯಾ ವಂದಿಸಿದರು.