ಪೈರಸಿ ಹೊಡೆದೋಡಿಸಲು ತಯಾರಾದ ಚಿತ್ರತಂಡ  

ಕಿಚ್ಚ ಸುದೀಪ್ ಅಭಿನಯದ ಬಹು ನೀರೀಕ್ಷಿತ 'ಮಾರ್ಕ್‌' ಸಿನಿಮಾ ಇಂದು (ಡಿ.25) ಕ್ರಿಸ್ಮಸ್ ಹಬ್ಬದ ಪ್ರಯುಕ್ತ ಕನ್ನಡ, ತಮಿಳು, ತೆಲುಗು ಭಾಷೆಯಲ್ಲಿ ಅದ್ದೂರಿಯಾಗಿ ರೀಲೀಸ್ ಆಗುತ್ತಿದೆ. ಈಗಾಗಲೇ ಹಾಡು, ಟ್ರೇಲರ್‌ನಿಂದ ಪ್ರೇಕ್ಷಕರ ಹೃದಯ ಗೆದ್ದಿರುವ 'ಮಾರ್ಕ್‌' ಈ ವರ್ಷದ ಹಿಟ್ ಸಿನಿಮಾ ಆಗುವುದರಲ್ಲಿ ಎರಡು ಮಾತಿಲ್ಲ. ಹಾಗೆಯೇ ಈ ಚಿತ್ರವನ್ನು ಪೈರಸಿಯಿಂದ ತಪ್ಪಿಸಲು ಚಿತ್ರತಂಡ ತಯಾರಿ ಕೂಡ ಮಾಡಿಕೊಂಡಿದೆ. ಹೌದು 'ಸದ್ಯ ಚಿತ್ರರಂಗಕ್ಕೆ ದೊಡ್ಡ ಶತ್ರುವಾಗಿದೆ ಪೈರಸಿ. ಪೈರಸಿ ಹೊಡೆದೋಡಿಸಿ ಚಿತ್ರರಂಗವನ್ನು ರಕ್ಷಿಸುವುದು ನಮ್ಮೆಲ್ಲರ ಹೊಣೆ. ಆ ನಿಟ್ಟಿನಲ್ಲಿ ನಮ್ಮ ಪಡೆ ಯುದ್ಧಕ್ಕೆ ರೆಡಿ' ಎಂದು ಕಿಚ್ಚ ಸುದೀಪ್ ಹೇಳಿದ್ದಾರೆ. 

'ಮಾರ್ಕ್‌ ಸಿನಿಮಾದಲ್ಲಿ ನಾನು ನಿರ್ಮಾಪಕನಾಗಿದ್ದೇನೆ. ಈ ಸಿನಿಮಾ ಡಿಸ್ಟ್ರಿಬ್ಯೂಷನ್ ಹೊಣೆಯನ್ನು ಕೆ.ಆರ್ .ಜಿ. ಸಂಸ್ಥೆ ಜೊತೆ ನನ್ನ ಪತ್ನಿ ಪ್ರಿಯಾ ಹೊತ್ತಿದ್ದಾರೆ. ಈ ಸಂದರ್ಭದಲ್ಲಿ ನಮ್ಮ ಸಿನಿಮಾ ರಕ್ಷಣೆ ದೃಷ್ಟಿಯಿಂದ ನಮ್ಮ ಪಡೆ ಸಿದ್ದವಾಗಿದೆ, ಎಂದು ಪತ್ರಿಕಾ ಪ್ರತಿನಿಧಿಗಳಿಗೆ ವಿಶೇಷ ಸಂದರ್ಶನದಲ್ಲಿ ತಮ್ಮ ಮಾತಿಗೆ ಬದ್ಧತೆಯನ್ನು ತೋರಿಸಿದ್ದಾರೆ. ಮಾರ್ಕ್‌ ಸಿನಿಮಾ ಮ್ಯಾಕ್ಸ್‌ ಸಿನಿಮಾಕ್ಕಿಂತ 3 ಪಟ್ಟು ಬಂಡವಾಳ ಹಾಕಿದ್ದೇವೆ. ತಮಿಳು ಮತ್ತು ಕನ್ನಡದಲ್ಲಿ ಏಕಕಾಲಕ್ಕೆ ರೀಲೀಸ್ ಆಗಲಿದೆ. ನಮ್ಮ ಸಿನಿಮಾ ಜೊತೆ 45 ಸಿನಿಮಾ ಕೂಡ ಬರುತ್ತಿದ್ದು, ಎರಡು ಸಿನಿಮಾಗಳನ್ನು ನೋಡಿ ನಮ್ಮನ್ನು ಗೆಲ್ಲಿಸುತ್ತಾರೆ' ಎಂದು ಸುದೀಪ್ ಹೇಳಿದರು. 

ಅಂದಂಗೆ ಈ ಚಿತ್ರವನ್ನು ನಿರ್ದೇಶನ ಮಾಡಿರುವುದು ವಿಜಯ್ ಕಾರ್ತಿಕೇಯ. ಸಿನಿಮಾನಲ್ಲಿ ಸುದೀಪ್ ಜೊತೆಗೆ ಶೈನ್ ಟಾಮ್ ಚಾಕೊ, ಯೋಗಿ ಬಾಬು ಇನ್ನೂ ಕೆಲವು ಪ್ರತಿಭಾವಂತ ನಟರು ನಟಿಸಿದ್ದಾರೆ. ಕಿಚ್ಚ ಕ್ರಿಯೇಷನ್ ಮತ್ತು ಸತ್ಯಜ್ಯೋತಿ ಫಿಲಮ್ಸ್‌ ಬಂಡವಾಳ ಹೂಡಿದೆ. ಸಿನಿಮಾಕ್ಕೆ ಅಜನೀಶ್ ಲೋಕನಾಥ್ ಸಂಗೀತ ನಿರ್ದೇಶನ ಮಾಡಿದ್ದಾರೆ.