ಧಾರವಾಡ 19: ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಯೋಗದಲ್ಲಿ ದಾರವಾಡ ಜಿಲ್ಲೆಯ ಶಿವಳ್ಳಿ ಗ್ರಾಮದ ಶ್ರೀ ದುರ್ಗಾದೇವಿ ಡೊಳ್ಳಿನ ಸಂಘ ಆಯೋಜಿಸಿದ್ದ "ಜಾನಪದ ವೈಭವ" ಕಾರ್ಯಕ್ರಮವು ಭಾನುವಾರ ಧಾರವಾಡದ ಕನ್ನಡ ಸಾಹಿತ್ಯ ಭವನದಲ್ಲಿ ವಿಜೃಂಭಣೆಯಿಂದ ನಡೆಯಿತು.  ಕಾರ್ಯಕ್ರಮವನ್ನು ಕರ್ನಾಟಕ ವಿಶ್ವವಿದ್ಯಾಲಯದ ಮಾಜಿ ಸಿಂಡಿಕೇಟ್ ಸದಸ್ಯ ಪರಮೇಶ್ವರ್ ಕಾಳೆ ಅವರು ಡೊಳ್ಳು ವಾದ್ಯ ಬಾರಿಸಿ ಹಾಗೂ ಸಸಿಗೆ ನೀರೆರೆಯುವ ಮೂಲಕ ಉದ್ಘಾಟಿಸಿದರು.  

ಬಳಿಕ ಮಾತನಾಡಿದ ಅವರು, ನಮ್ಮ ಜಾನಪದ ಕಲೆಗಳು ಅನಾದಿ ಕಾಲದಿಂದ ಪರಂಪರಾಗತವಾಗಿ ಬೆಳೆದು ಬಂದ ಅಮೂಲ್ಯ ಸಾಂಸ್ಕೃತಿಕ ಪರಂಪರೆಯಾಗಿದ್ದು, ಇಂದಿನ ಪೀಳಿಗೆಯಲ್ಲಿ ಅವುಗಳ ಬಗ್ಗೆ ಜಾಗೃತಿ ಮೂಡಿಸುವ ಅಗತ್ಯವಿದೆ ಎಂದು ಹೇಳಿದರು. ಪ್ರಾಥಮಿಕ ಶಿಕ್ಷಣದಿಂದ ಉನ್ನತ ಶಿಕ್ಷಣದವರೆಗೆ ಪಠ್ಯ ಚಟುವಟಿಕೆಗಳೊಂದಿಗೆ ಜಾನಪದ ಕಲೆಗಳಿಗೆ ಸಂಬಂಧಿಸಿದ ವಿಷಯಗಳನ್ನು ಅಳವಡಿಸಲು ಸರ್ಕಾರ ಹಾಗೂ ಸಂಬಂಧಿತ ಇಲಾಖೆಗಳು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.  

ಹಿರಿಯ ಜಾನಪದ ಕಲಾವಿದರನ್ನು ಪರಿಚಯಿಸುವ ಹಾಗೂ ರಾಜ್ಯಮಟ್ಟದ ಜಾನಪದ ಕಲಾ ಪ್ರದರ್ಶನಗಳನ್ನು ಆಯೋಜಿಸಲು ಸದಾ ಸಿದ್ಧನಿರುವುದಾಗಿ ತಿಳಿಸಿ, ಎಲ್ಲರ ಸಹಕಾರ ಕೋರಿದರು.  ಉತ್ತರ ಕರ್ನಾಟಕ ಜಾನಪದ ಕಲಾವಿದರ ಒಕ್ಕೂಟದ ಅಧ್ಯಕ್ಷ ಯಕ್ಕೇರ​‍್ಪ ನಡುವಿನಮನಿ ಅಧ್ಯಕ್ಷತೆ ವಹಿಸಿದ್ದರು.  ಹಿರಿಯ ಜಾನಪದ ಕಲಾವಿದ ಅರ್ಜುನ ಮಾದರ, ರಂಗಪ್ಪ ಲಕ್ಕನ್ನವರ, ಮಾದೇವಪ್ಪ ತಡಹಾಳ, ಮಂಜುನಾಥ ಸುಳ್ಳದ, ಪ್ರಕಾಶ ಕುಂದಗೋಳ, ಮಾಯಪ್ಪ ಕುಪ್ಪನ್ನವರ, ಮಂಜುನಾಥ ಉಣಕಲ್ಲ, ನಾಗಪ್ಪ ರಾಮಣ್ಣವರ, ಅರ್ಜುನ ಹದ್ಲಿ, ಹನುಮಂತಪ್ಪ ಲಕ್ಕನ್ನವರ, ವಿಠ್ಠಲ ಕಳ್ಳಿಮನಿ ಸೇರಿದಂತೆ ಅನೇಕ ಗಣ್ಯರು ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ್ದರು.  

ಡೊಳ್ಳಿನ ಸಂಘದ ಅಧ್ಯಕ್ಷ ಮಲ್ಲಪ್ಪ ಲಕ್ಕನ್ನವರ ಗಣ್ಯರನ್ನು ಸ್ವಾಗತಿಸಿದರು. ಮುದುಕಪ್ಪ ಬೆಂಗೇರಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಕರ್ನಾಟಕ ಜಾನಪದ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ ಡಾ. ಪ್ರಕಾಶ ಮಲ್ಲಿಗವಾಡ ಕಾರ್ಯಕ್ರಮ ನಿರ್ವಹಿಸಿದರು. ಮಂಜುನಾಥ ಗಾಯಕವಾಡ ವಂದಿಸಿದರು. ವೇದಿಕೆಯಲ್ಲಿ ಕೆಂಚಪ್ಪ ಲಕ್ಕನ್ನವರ, ಶಿವಪ್ಪ ಕಳ್ಳಿಮನಿ, ಪಡೆಪ್ಪ ಬಡಪ್ಪನವರ, ಬಸಪ್ಪ ಲಕ್ಕನ್ನವರ, ಮಲ್ಲಪ್ಪ ಬಡಪ್ಪನವರ, ಕಲ್ಮೇಶ ಲಕ್ಕನ್ನವರ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.